Bugün Azərbaycan Futnet Federasiyasının fəaliyyətə başlamasının 5 ili tamam oldu.
2017-ci ildə ölkəmizdə iki idman növünü özündə birləşdirən Futnet Federasiyası təsis edilib. Təsis konfransında federasiyasının prezidenti Vüsal Xəlilov seçilib.
Futnet və futvole idman növləri üzrə daxili və beynəlxalq yarışların təşkili ilə ilk ildən məşğul olan qurum milli komandalarımızın formalaşdırılması, bu iki idman növünün ölkəmizdə populyarlaşması, təbliği və inkişafını da öz üzərinə götürüb.
Federasiya vüsal Xəlilovun rəhbərliyi ilə qısa zamanda beynəlxalq idman dairələrində böyük nüfuz qazanaraq bir çox mötəbər turnirlərə dəvət alıb, dünya və Avropa Çempionatlarının keçirilməsində bilavasitə yaxından iştirak edərək bu istiqamətdə örnək iş sərgiləmişdir.
Mütamadi olaraq futnet və futvole üzrə Azərbaycan Çempionatlarını və ölkə kuboku uğrunda yarışları təşkil etməklə paralel, federasiya rəhbərliyi Bakıda bir çox yüksək səviyyəli beynəlxalq turnirlərə də ev sahibliyi edib.
Futnet Federasiyası (qısa adı AFNF) hər iki idman növünün təkcə paytaxt bakıda deyil, bölgələrimizdədə inkişafı üçün daim rayonlarda turnirlər təşkil edir.
Futvole və futnet üzrə milli komandaların tərkinin müəyyən edilməsi kimi vacib bir öhdəliyi də öz üzərinə götürən AFNF, həmdə idmançılarımızın beynəlxalq yarışlarda Azərbaycanı yüksək səviyyədə təmsil etməsini təmin edərək, bayrağımızı dünyanın dörd bir yanında dalğalandırıb.
